Шароф Рашидов туманидаги 10-умумтаълим мактабида баҳор ва янгиланиш айёмига бағишланган “Ассалом, Наврўз!” номли байрам тадбири ўзгача кўтаринки руҳда ўтказилди. Мазкур шодиёна Шоҳиста Маматқулова раҳбарлигидаги 1-“Б” синф ўқувчилари иштирокида ташкил этилиб, унда миллий қадриятларимиз, урф-одатларимиз ва халқ анъаналари кенг тараннум этилди. Тадбир давомида жажжи болажонларнинг чиқишлари йиғилганларда катта таассурот қолдирди.

Байрам дастуридан ўрин олган шеърхонлик ва ижро этилган куй-қўшиқлар даврага байрамона кайфият бағишлади. Шунингдек, ўқувчилар миллий қадриятларимиз акс этган мақоллар айтиб, халқ донолигини намоён этдилар. Тадбирнинг энг қизиқарли қисми сифатида намойиш этилган саҳна кўринишларида Наврўзнинг мазмун-моҳияти, халқимизга хос меҳр-оқибат, аҳиллик ва бағрикенглик ғоялари моҳирона ёритилди.
Миллий ўйинлар билан давом этган тадбирда ўқувчилар “Арқон тортиш” ҳамда “Оқ теракми, кўк терак” каби беллашувларда фаол иштирок этиб, ўзларининг жамоавийлик аҳилликларини намоён этдилар. Айниқса, ўқувчиларнинг ранг-баранг миллий либосларда иштирок этгани тадбирга алоҳида кўрк бағишлади.
Умуман олганда, ушбу тадбир ўқувчиларнинг миллий қадриятларимизга бўлган ҳурматини ошириш, уларни бой маданий меросимиз руҳида тарбиялашда муҳим аҳамият касб этди. “Ассалом, Наврўз!” байрами барча иштирокчиларга олам-олам қувонч ва унутилмас илиқ таассуротлар улашди.