КУЧЛИ МОТОСПОРТЧИЛАР САРАЛАНДИ

Жиззах шаҳридаги “Наврўзбулоқ” пойгагоҳида мотокросс бўйича вилоят биринчилиги мусобақаси ўтказилди.

Вилоят ҳокимлиги ва Ўзбекистон Республикаси мудофаасига кўмаклашувчи “Ватанпарвар” ташкилотининг вилоят кенгаши ташаббуси билан ташкил этилган мазкур мусобақада республикамизнинг турли ҳудудларидан ташриф буюрган 50 нафардан зиёд мотоспортчи ғолиблик учун кураш олиб борди.

Мусобақа шартларига кўра, пойга ёшлар ва катталар таснифида ўтказилиб, иштирокчилар двигатель ҳажми 65, 85, 125, 350, 500 ва 750 см3 бўлган спорт мотоциклларида беллашувларга киришдилар.

Якуний натижаларга кўра, жиззахлик мотокросчилардан Даврон Камолов (65 см3) ва Толиб Қудратов (Хитой класси) ўз йўналишларида марра чизиғини энг биринчилардан бўлиб кесиб ўтган ҳолда олтин медални қўлга киритдилар. Шунингдек, қизғин кечган пойгалар давомида Ярослав Масленников (Навоий вилояти, 85 см3), Саидбобожон Саидов (Навоий вилояти, 125 см3), Бекзод Халимбоев (Бухоро вилояти, 500 см3), Анвар Алимов (Тошкент шаҳри, ЧЗ-350 см3), Ориф Дадабоев (Наманган вилояти) ҳамда Николай Шарабаев (Қорақалпоғистон Республикаси) шоҳсупанинг энг юқори поғонасидан жой эгаллаб, чемпион бўлдилар.

Ғолиб спортчилар ташкилотчилар томонидан диплом, медаль ҳамда эсдалик совғалари билан тақдирланишди.  

Юсуфбек САЙДАЛИЕВ.

Leave a Reply

Your email address will not be published. Required fields are marked *