ЖИЗЗАХДА ҚИЛИЧБОЗЛАР БЕЛЛАШУВИ

Жиззах шаҳридаги “Киберспорт” аренада қиличбозлик бўйича 23 ёшгача бўлган спортчилар ўртасида Ўзбекистон чемпионати баҳслари бўлиб ўтди.

Мазкур нуфузли мусобақада Қорақалпоғистон Республикаси, Тошкент шаҳри ҳамда юртимизнинг барча вилоятларидан ташриф буюрган спортчилар қиличбозликнинг ҳар учала тури – сабля, рапира ҳамда шпага йўналишлари бўйича индивидуал ҳамда жамоавий дастурларда ғолиблик учун беллашдилар.

Сабля йўналишида йигитлар ўртасидаги баҳсларда Қорақалпоғистон Республикаси вакили Алпамис Уракбаев барча рақибларини мағлуб этиб, чемпион бўлди. Қизлар ўртасидаги беллашувларда бир неча карра Жаҳон кубоги, Осиё чемпионати ва маҳаллий турнирлар ғолиб ва совриндори жиззахлик Самира Шокированинг чиқишларини жорий мусобақада кўпчилик интиқлик балан кутаётган эди. Амалда ҳам Самира барча рақибларидан устунлигини исботлаб, якунда  олтин медални қўлга киритди.

Турнирнинг шпагачилар тўқнашувида Қорақалпоғистон Республикасининг яна бир спортчиси Азамат Кудейбергенов ғолиб бўлди. Қизлар ўртасидаги баҳсларда эса биринчилик андижонлик Озода Усмонжоновага насиб этди.

Рапира бўйича ўтказилган дастурда Андижон вилоятидан Радмир Семенеев олтин медалга эга чиқди. Тошкентлик Сабина Адашалиева қизлар ўртасидаги баҳсларнинг ғолибига айланди.

Мусобақанинг жамоавий дастурларида сабля, шпага ва рапира бўйича  беллашувларда мос равишда Қорақалпоғистон Республикаси, Бухоро ҳамда Андижон вилояти вакиллари биринчиликни қўлга киритди.  

Юсуф САЙДАЛИЕВ.

Leave a Reply

Your email address will not be published. Required fields are marked *