МАҲОРАТЛИ КИКБОКСИНГЧИЛАР ЖИЗЗАХДА ЖАМ БЎЛДИ

Жиззах шаҳридаги “Киберспорт арена”да кикбоксинг бўйича ёшлар ва катталар ўртасида Ўзбекистон чемпионати баҳслари бўлиб ўтди. Мазкур нуфузли мусобақада республикамизнинг барча ҳудудларидан келган 700 га яқин маҳоратли спортчилар ғолиблик учун рингга кўтарилдилар.

Беш кун давом этган муросасиз жанглар давомида спортчилар “low-kick”, “full-contact”, “light-contact”, “point fighting” ва “K1” каби йўналишлар бўйича беллашувларга киришиб, бор маҳорат ва кўникмаларини ишга солишди. Баҳсларнинг 42 нафар халқаро ва миллий тоифадаги ҳакамлар томонидан юқори савияда баҳолаб борилганини қайд этиш жоиз.

Мусобақанинг якуний натижаларига кўра, умумжамоа ҳисобида Бухоро вилояти жамоаси 32 та олтин медаль билан биринчи ўринни қўлга киритди. Тошкент шаҳри (19 та олтин) ва Андижон вилояти (15 та олтин) жамоалари эса рейтингда кучли учликка якун ясади.

Ғолиб ва совриндорларга медаль, диплом ва эсдалик совғалари топширилди.

Юсуфбек САЙДАЛИЕВ.

Шерзод ЭГАМҚУЛОВ (фото).

Leave a Reply

Your email address will not be published. Required fields are marked *